விசேட தேவையுடைய பிள்ளைகளும் மனிதர்கள் என்ற வகையில் கல்வி ஊடாக முன்னேற்றம் பெறுவதற்கு உரித்துக் கொண்டவர்கள் அவர்களுக்கு ஆலோசனை வழங்கல் சேவை மிக அவசியமாகும். அவர்களின் எதிர்கால வளர்ச்சி தொடர்பில் இதன் அவசியப்பாட்டை பொருத்தமான ஆதாரங்களை காட்டி விபரிக்குக.
சாதாரண பிள்ளைகளுடன் ஒப்பிடும்போது உடல், உள மற்றும் மனவளர்ச்சி ரீதியில் இயலாமை கொண்டோரும் மீத்திறன் கொண்ட பிள்ளைகளுமே விசேட தேவையுடைய பிள்ளைகள் ஆகும். இத்தகைய பிள்ளைகள் சாதாரண பிள்ளைகளுடன் ஒப்பிடும்போது கற்றல் செயற்பாடுகளில் குறைவாகவே செயற்படுவர். இவர்களுக்கு வழங்கப்படும் கல்வியே விசேட தேவைகள் சார் கல்வியாகும். இது அனைவருக்கும் கல்வி வழங்கப்பட வேண்டும் என்ற எண்ணக்கருவின் அடிப்படையிலேயே வழங்கப்பட்டு, அவர்கள் கல்வியில் முன்னேற்றம் பெறுவதற்கு உரித்துடையவர்கள் என்பது நிரூபிக்கப்படுகிறது.
விசேட தேவைகள் சார் பிள்ளைகள் எனும்போது
மீத்திறன் உடைய பிள்ளைகள்
பார்வைக் குறைபாடுடைய பிள்ளைகள்
கேட்டல் குறைபாடுடைய பிள்ளைகள்
கற்றல் இயலாமை உடைய பிள்ளைகள்
மொழி பேச்சு குறைபாடுடைய பிள்ளைகள்
உடல் குறைபாடு உடைய குழந்தைகள்
ஓட்டிசம்
போன்ற வகையான பிள்ளைகள் உள்ளடங்குகின்றனர். இவர்களுக்கு கல்வி வழங்கப்படும் போது, அவர்களுக்கு ஆலோசனை வழங்கல் சேவையை வழங்குவது மிக அவசியமான ஒன்றாகும். இச்சேவை அவர்களின் எதிர்கால வாழ்வின் வெற்றிக்கு உறுதுணையாக அமைகிறது என்பதை கீழே விரிவாக நோக்கலாம்.
விசேட தேவையுடைய பிள்ளைகளின் வகைகளை தனித்தனியாக அவர்களுக்கு ஆலோசனை வழிகாட்டல் சேவையின் அவசியத்தையும் தனித்தனியாக சற்று விரிவாக நோக்குவோம்
- மீத்திறனுடைய பிள்ளைகள்
திறன் கொண்ட பிள்ளைகளும் விசேட தேவையுடையோர் வகையைச் சேர்ந்தவராவர், அவர்களது ஆற்றலை தக்கவைக்கும் வகையில் வாய்ப்புகளையும் அனுபவங்களையும் வழங்குதல் வேண்டும். மீத்திறன் என்பது நுண்மதியின் கணிப்பின்படி நுண்ணறிவு ஈவு140க்கு மேல் பெற்றவர்கள் ஆவர். என்று ரெர்மன் குறிப்பிடுகின்றார். இவர்கள் பாட அடைவின் மேல்மட்டத்தில் காணப்படுவர். கிரகித்தல், பகுத்தல், தொகுத்தல் ஆற்றலின் மேம்பாடு, தர்க்க ரீதியாக சிந்தித்தல், பிரச்சினை விடுவித்தல் ஆகியவற்றில் விசேட திறன் பெற்றிருப்பர். இத்தகைய மாணவர்கள் வகுப்பறையில் 3 தொடக்கம் 5 வீதமானவர்கள் காணப்படுவர்
கானேயின் கருத்துப்படி மீத்திறன் என்பது ஒன்று அல்லது அதற்கு மேற்பட்ட உளச்சார்பு ஆட்சிகளில் அதிகமான ஆற்றல் ஆகும் மீத்திறனும் திறமையும் கொண்ட பிள்ளைகள் தொழில்ரீதியான தகைமை பெற்ற நபர்களினால் அடையாளம் காணப்படுகின்றனர். அதிக ஆற்றலும் உயர் செயலாற்றலுமே இவர்களை இனங்கான உதவுகின்றன. இவர்களிடத்தில் பின்வரும் ஆற்றல்களை வெளிப்படுத்துவர்
- பொதுவான அறிவு சார் ஆற்றல்
- குறிப்பான கல்விசார் ஆற்றல்
- படைப்பாற்றல் அல்லது ஆக்கபூர்வமான சிந்தனை
- தலைமைத்துவ ஆற்றல்
- கட்புல அரங்கேற்ற கலைகள்
- இயக்க ஆற்றல்
வகுப்பறையில் மீத்திறன் கொண்ட மாணவர்களின் தேவைகள் பூர்த்தி செய்யப்பட வேண்டும் எனில் தமது ஆற்றலுக்கு ஏற்ப வகுப்பறை செயற்பாடுகள் அமைந்திருத்தல் வேண்டும் அத்தகைய மாணவர்களுக்கான வகுப்பறைகளை வடிவமைக்கும்போது பின்வரும் விடயங்கள் கவனத்திற் கொள்ளப்படல் வேண்டும்
- விசாரணைகளை வரவேற்கத்தக்க அறையை உருவாக்குதல்
- உள்ளடக்க பகுதிகளை இணைக்க கருப்பொருள் சார்ந்த அறிவுறுத்தல்களை வழங்குதல்
- பல்வேறு விதமான உபகரணங்கள் பொருட்களை வைத்திருத்தல்
- நெகிழ்ச்சியான ஆசன வசதிகளை ஏற்படுத்தல்
- கற்றல் நிலைமைகளை ஏற்படுத்தல்
- படைப்பாற்றல் கொண்ட சிந்தனையை ஒன்றிணைத்தல்
- கலைத்திட்டத்தை கட்டுக்கோப்பாகக்கல்
ஒரு வகுப்பறையில் மீத்திறன் உடைய பிள்ளைகளின் தேவைகளை நிறைவேற்றும் வகையில் வகுப்பறை செயற்பாடுகளை முன்னெடுக்கும் போது தான் சுமுகமான கற்றல் செயற்பாட்டை ஏற்படுத்த முடியும்
மீத்திறன் உடைய பிள்ளைகளின் பொதுவான இயல்புகள்
- கற்றல் சார் இயல்புகள் - தர்க்கரீதியான பகுப்பாய்வு சார் சிந்தனை
தனது கருத்துக்களுக்கு சான்றுகளை முன் வைத்தல்
ஏன் இப்படி என்பவற்றை தானாக கண்டறிதல்
பிரச்சினைகளை அறிதலும் தீர்த்தலும்
தொகையான தகவல்களை ஞாபகத்தில் கொள்ளுதலும்
பிரச்சனைகளுக்கு சரியான தீர்வுகளை கண்டறிதல்
தொடர்புகொண்டு கோலங்களை இலகுவில் அறிதல்
- ஆக்க சிந்தனை சார்ந்த இயல்புகள் - சொந்தக் கருத்துக்களை உருவாக்குதல்
அறிவுசார்ந்த விளையாட்டுகளில் ஈடுபடுதல் கற்பனைகளில் ஈடுபடுதல், நகைச்சுவையில் ஆர்வம், தொடர்புகள் அசாதாரண தொடர்புகளை தேடுதல், எதிர்காலத்தைப் பற்றி சிந்தித்தல், எதிர்வுகூறல், அழகியல் பண்புகள் வழிகாட்டல்
- ஊக்கம் சார்ந்த இயல்புகள்
தன்னைத்தானே வழிபடுதல் சுதந்திரமாக பணிபுரிய விரும்புதல்
தமது பணிகளில் ஆழ்ந்து விடுதல்
இலக்குகளை நிர்ணயித்தல் பணிகளை முடிப்பதில் உறுதியாக இருத்தல்
- சமூக தலைமைத்துவ இயல்புகள்
சமூக முதிர்ச்சி காட்டுதல் பொறுப்பேற்க விரும்புதல்
புதிய சூழ்நிலைக்கு ஏற்ப தன்னை மாற்றிக் கொள்ளல்
அவர்கள் மத்தியில் பிரபல்யமாக இருத்தல்
பிறருடன் நன்றாக தொடர்பு கொள்ளுதல்
சுயநம்பிக்கை அதிகமாக இருத்தல்
- சுயநிர்ணய இயல்புகள் - ஆழமான வினாக்களை வினவுதல் தன்னிச்சையான தீர்மானங்களை கேள்விக்கு உட்படுத்தல் ஆசிரியர்களும் வளர்ந்தவரும் கூறும் கருத்துக்களை விளக்குமாறு கேட்டல் ,வளர்ந்த பிள்ளைகள் மற்றும் வளர்ந்தவரது சகவாசத்தை விரும்புதல், வளர்ந்தோர் பிரச்சினைகளில் வயதுக்கு முந்திய ஆர்வம் காட்டுதல்
இத்தகைய மீத்திறன் உடைய மாணவர்களுக்கு ஆலோசனை வழிகாட்டல் சேவையானது அவசியமானதாகும். இவ்வாறு உயர்ந்த அடைவினை கொண்ட மாணவர்கள் ஆரம்பத்திலேயே கவனிக்கப்பட்டு அவர்களுக்குரிய வசதி வாய்ப்புகள் ஏற்படுத்திக் கொடுக்கப்பட வேண்டும் இல்லையெனில் அவர்களுடைய திறமைகள், ஆற்றல்கள் மறைந்து போவதற்கான சந்தர்ப்பங்கள் உள்ளன மேலும் இவ்வாறு உயர் ஆற்றல் கொண்ட பிள்ளைகளை சாதாரண பிள்ளைகள் வேறு கண்ணோட்டத்தில் பார்க்கும் தன்மையும் உள்ளது இதனை மாற்றியமைப்பதற்கு பிள்ளைகளுக்கு ஆலோசனை வழிகாட்டல் சேவையினை ஆசிரியர்கள் கட்டாயமாக வழங்குதல் வேண்டும்
மீத்திறன் உடைய பிள்ளைகளுக்கான வழிகாட்டல் ஆலோசனைகளாக கீழ் வருவனவற்றை குறிப்பிடலாம்,
- மாணவர்களின் நிறைகளும் குறைகளும் விழிப்புணர்வை ஏற்படுத்தல்
- தீர்மானம் எடுப்பதிலும் திட்டமிடுவதில் உதவி செய்தல்
- தொழில் வளர்ச்சிக்கு உதவுதல்
- உயர் வலைத்தளங்களில் சாதனையில் உதவுதல்
- உயர் வளர்ச்சி அடைவதற்கு உதவுதல்
மீத்திறன் உடைய மாணவர்களுக்கு விசேட கவனம் செலுத்தும் நாடுகளில் இவர்களுக்கு பல ஏற்பாடுகள் செய்யப்பட்டுள்ளன உதாரணமாக பாடசாலைக்கு குறைந்த வயதில் அனுமதி, வகுப்பொன்றை தாண்டிச் செல்லுதல், விசேட பாடசாலைகள், துரிதப்படுத்தும் செழுமைப்படுத்தும் நிகழ்ச்சித்திட்டங்கள் போன்றவையாகும். இலங்கைப் பாடசாலை சூழ்நிலையை பொருத்தளவில் சாதாரண வகுப்பறை சூழ்நிலையில் வழங்கக்கூடிய வசதிகள் பற்றி நாம் சிந்திக்க வேண்டியுள்ளது இது பல வகைகளில் நடைபெறலாம் இம் மாணவர்களின் மீத்திறன் திறமைகள் வெளிப்பட்டு விருத்தி செய்யப்படுவதற்கு சவாலாக அமைகின்ற, கலைதிட்டம் வழங்கப்படலாம். சமாந்தரமான நிகழ்ச்சித்திட்டம் இதற்கு உதவும் இதில் மாணவர்கள் தனியாக அல்லது குழுக்களாக ஒரே தலைப்பில் ஆனால் ஒவ்வொரு அறிவுசார் அல்லது திறமை மட்டங்களில் செயல்படுவர்.
- பார்வைக் குறைபாடுடைய பிள்ளைகள்
பார்வை குறைபாடு என்பது பார்வை இழப்பாகும் பார்வை குறைபாடு குறிப்பிட்ட தூரங்களில் இருந்து பார்க்கக்கூடிய கட்புலன் பார்வைப்புலன் ஆகிய அடிப்படையில் தீர்மானிக்கப்படுகின்றது. பார்வை குறைபாடு மாணவர்களின் கற்றல் சூழலை வெகுவாக பாதிக்கின்றது. பார்வைக்குறைபாடு பின்வரும் வகையில் அமைந்திருக்கலாம்.
- பகுதிப் பார்வை உள்ளவர்கள்
- குறைவான பார்வை
- சட்டரீதியான குருட்டுத்தன்மை
- பூரணமான குருட்டுத்தன்மை
கட்புல குறைபாடு பிறப்புக்கு முன்பு அல்லது பிறப்பிற்கு பின்போ ஏற்படலாம். பிறப்பிற்கு முன்னரே ஏற்படும் குறைபாடுகள் பிறப்பின் போது அல்லது பிறப்பிற்குப் பின்னர் ஏற்படும் குறைபாடுகளை விட கடுமை குறைந்தவை. நிறை குறைந்து பிறக்கும் பிள்ளைகளும் நரம்பு வலையமைப்பில் ஏற்படும் பாதிப்புகளாலும் கட்புல குறைபாடுகள் ஏற்படலாம்.கட்புல குறைபாடுகளில் பின்வரும் அம்சங்கள் பொதுவானவையாக காணப்படும்.
- கண் வாக்கு
- கண்கள் சிவந்து இருத்தல்
- கண்ணில் நீர் தேங்குதல்
- பொருக்குக் கண்ணிமைகள்
- அடிக்கடி கண்கட்டி ஏற்படல்
- கண் மங்குதல்
- கண் இமைகள் தொங்குதல்
இத்தகைய பிள்ளைகளில் தலையிடி, குமட்டல், கண்கள் எரிதல், மங்கலாக தோன்றுதல், கண்களில் வலி, சொற்களின் வரிகள் அசைதல் போன்றவை காணப்படலாம். இத்தகைய மாணவர்களுக்கு ஆசிரியர்கள் வகுப்பறை உதவிகளை வழங்குதல் வேண்டும்.
வகுப்பறையில் நுழையும் போதும் விலகும் போதும் கதைத்தல்
மாணவர்களை பெயர் சொல்லி அழைத்தல்
வகுப்பறையின் முன்புறத்தில் ஆசன வசதி செய்து கொடுத்தல்
பார்வை குறைபாடு உள்ள பிள்ளைகளுக்கு சத்தமாகப் பேசுதல்
உண்மை பொருட்களை காட்டி கற்பித்தல்
பரீட்சைக்கு கூடிய நேரம் ஒதுக்குதல்
கவனத்தை கலைக்கும் வெளிச்சத்தை தவிர்த்தல்
வகுப்பறையில் சிதறிக் கிடக்கும் பொருட்களை தவிர்த்தல்
கற்றல் செயல்பாட்டில் குறைபாடு பொதுவாக பாதிப்பை ஏற்படுத்துகின்றது. கற்றலில் பார்வை மிக முக்கிய அம்சமாகும் இத்தகைய குறைபாடு உடையவர்கள் மருத்துவரீதியாக ஆற்றுப்படுத்த வேண்டியவர்களை இனங்கண்டு அதற்கான உதவிகளை செய்வதுடன் வகுப்பறையில் பார்வை குறைபாடு உடையவர்களுக்கு பொருத்தமான வழிமுறைகளை கையாண்டு கற்பிக்க வேண்டியது ஆசிரியர்களின் கடமையாகும்.
பார்வை குறைபாடு உள்ள மாணவர்களுக்கான வழிகாட்டல் ஆலோசனை களாக கீழ் வருவனவற்றை குறிப்பிடலாம்.
பாடசாலைகளில் விடுதி வசதிகள் வழங்குதல்
விசேட துணைக்கருவிகள் வழங்குதல்
தனிக் கருவிகள் வழங்குதல்
விளையாட்டு பயிற்சி
தொழிற்பயிற்சி
இசைப்பயிற்சி
மருத்துவ வசதிகளை வழங்குதல்
விசேட பாடசாலைகளையும் போக்குவரத்து வசதிகளையும் வழங்குதல்
கட்புல பயிற்சிகளை வழங்குதல்
தற்காலத்தில் அதிகமான பார்வைக்குறைபாடுள்ள ஆண் பெண் இருபாலாரும் நன்றாகப் பயின்று பல்வேறு துறைகளில் வேலை செய்வதைக் காணலாம். இதற்குக் காரணம் அவர்கள் தங்களது வெற்றிக்கு சவாலாக அமைந்த விடயங்களை சிறந்த முறையில் முகங்கொடுத்தமையாகும். இவ்வாறு தற்போது பார்வைக் குறைபாடுள்ள மாணவர்களும் தங்களது பிரச்சினைகளை சிறந்த முறையில் எதிர்கொள்வதற்கு ஆலோசனை வழிகாட்டல் சேவை அவசியமாகிறது.
கேட்டல் குறைபாடுடைய பிள்ளைகள்
கேட்டல் குறைபாடு என்பது செவிடு கேற்பதற்குச் சிரமம் ஆகியவற்றை உள்ளடக்கியது. இது பிள்ளையின் கல்விசாரா செயற்பாடுகளை பெரிதும் பாதிக்கறது. செவிடு என்பது மிகக் கடுமையான கேட்டல் குறைபாடாகும். உபகரணங்களின் பயன்பாட்டுடனோ அல்லது இல்லாமலோ மொழிசார் தகவல்களை நிரற்படுத்தமுடியாத நிலை காணப்படும். செவிப்புலம் இழப்பானது பின்வரும் காரணங்களால் ஏற்படலாம்.
- நோய்த்தொற்றுக்கள்
- செவிப்பறை, செவிக்கால்வாய் முதலிய பகுதிகளில் சேதம் ஏற்படல்
- பிறப்புரிமையியல் குறைபாடுகள்
- செவி அல்லது தலையில் காயங்கள் ஏற்படல்
- மருந்துகள் கதிர்வீச்சுகள் காரணமாக ஏற்படல்
கேட்டல் குறைபாடுகள் உள்ள பிள்ளைகளிடத்தில் பின்வரும் இயல்புகள் காணப்படலாம்
தொடர்ச்சியான கவனம் இன்மை
திரும்பவும் கூறுமாறு கேட்டல்
பேசுபவரை நோக்கி தலையை சரித்தல்
ஒலியை விட அசைவு பற்றிய கூடிய விழுப்புணர்வு
வாய்மொழி எடுத்துறைப்புக்களை கேட்பதில் சிரமம்
மிக மெதுவாக கதைத்தல்
தாமதித்த மொழி விருத்தியை காட்டல்
இவ்வாறு கேட்டல் குறைபாடுள்ள மாணவர்களுக்கு ஆசிரியர் கீழ்வரும் உதவிகளை செய்யலாம்
ஆசிரியருக்கு அருகில் அமர்த்துதல்
செயற்பாடுகளில் பங்கு கொள்ளக்கூடியதாக இல்லை முழு வகுப்பையும் பார்க்கக் கூடியதாக இருத்தல்
இரைச்சல் உள்ள இடங்களில் அமர்த்தலை தவிர்த்தல்
பிள்ளை உங்கள் முதுகுக்குப் பின்னால் இருக்கும் போது பேசுவதை தவிர்த்தல்
கூடிய கட்புல சாதனங்களைப் பயன்படுத்தல்
வகுப்பறை கற்றல் செயற்பாடுகளின் போது கேட்டல் என்பது அத்தியாவசியமான ஒன்றாகும். முழுமையாக கற்றல் பெறுபேறுகளை அடைவதற்கு இது அவசியமாகும் குறைபாடுகள் கொண்ட பிள்ளைகள் இனங்காணப்பட்டு அவர்களுக்கு மருத்துவ ரீதியான உதவிகளை வழங்க நடவடிக்கை எடுப்பதுடன் குறைபாடுள்ளவர்களும் இயல்பாக வாழ முடியும் என்ற எண்ணத்தை பெற்றோர்கள் இடத்தையும் ஆசிரியர்கள் இடையேயும் ஏற்படுத்தவேண்டும். வகுப்பறை செயற்பாடுகளின் போது அவர்களின் கற்றல் தேவைகளுக்கு உகந்த செயற்பாடுகளை முன்னெடுப்பது ஆசிரியரின் கடமையாகும் இத்தகைய செயற்பாடுகளை வழங்குவதற்கு ஆலோசனை வழங்கல் சேவையானது முற்படுகின்றது.
கேட்டல் குறைபாடுடைய பிள்ளைகளுக்கான வழிகாட்டல் ஆலோசனை வழங்கல் சேவை பின்வரும் வழிகளில் வழங்கப்படுகின்றது.
காது கேட்கும் கருவியை உபயோகப்படுத்துவதற்கு பயிற்சி அளித்தல்
கேட்கும் திறமை பயிற்சி அளித்தல்
உதடுகளின் அசைவை அறிதல்
கற்றல் இயலாமை உடைய பிள்ளைகள்
இது ஒரு நரம்பு சார் ஒழுங்கீனமாகும். வாசிப்பு, எழுத்துக் கூட்டல், ஞாபகப்படுத்தல், தகவல்களை ஒழுங்குபடுத்தல் ஆகியவற்றில் அவர்களுக்கு சிரமங்கள் காணப்படும். கற்றல் இயலாமைகளால் அவர்களுக்கு தனியாள் சுய கௌரவம் பாதிக்கப்படும். இதனை குணப்படுத்த முடியாது ஆனால் குறைக்க முடியும் இதனை கண்டறிவதில் சிரமம். இத்தகைய பிள்ளைகளே மெல்லக்கற்கக் கூடியவர்களாக காணப்படுவர். கற்றல் இயலாமை காரணமாக கற்றல் அடைவு மற்றும் அவர்களது முன்னேற்றங்கள் பாதிக்கப்படும். பிள்ளையின் மொழி விருத்தி, உடல் விருத்தி, கல்வி விருத்தி மற்றும் புலக்காட்சி விருத்தி முதலியவற்றில் ஒழுங்கற்ற விருத்திக் கோலத்தைக் கொண்டிருக்கும் கற்றல் இயலாமை பல்வேறு காரணங்களால் ஏற்படலாம்.
- தமது வயது பிரிவினரை விட மிகவும் மெதுவாக வளர்ச்சியடைதல்
- சாதாரண பார்வையும் கேட்டலும் கொண்ட பிள்ளைகள் கூட ஒளி ஒலிகளை பிழையாக வியாக்கியானம் செய்தல்
- பிறப்புக்கு முன்னர் ஏற்படும் பாதிப்புகளும் கற்றல் பிரச்சினைகளை கொண்டு வரும்
- உரிய காலத்திற்கு முன்னர் பிள்ளை பிறந்தவுடன் சிரமங்களை அனுபவித்தல் காரணமாகவும் கற்றல் இயலாமை ஏற்படலாம்
- மூளையில் ஏற்படும் குருதிப்பெருக்கு காரணமாகவும் மூளைக்காய்ச்சல் காரணமாகவும் இது ஏற்படலாம்
- குழந்தைப்பருவத்தில் பராமரிப்பு இன்மை இவற்றாலும் கற்றல் இயலாமை ஏற்படலாம்
இக்கற்றல் இயலாமையில் வாசிப்பு சார் இயலாமை, எழுதுவதில் இயலாமை,கணிதம் சார் இயலாமை, மொழி சாரா கற்றல் இயலாமை இத்தகைய குறைபாடு உடைய பிள்ளைகளின் கற்றல் வேகத்திற்கு ஏற்ப ஆசிரியர்களின் செயல்பாடுகள் ஒழுங்கமைக்கப்படல் வேண்டும். கற்றலின் வேகத்தை படிப்படியாக அதிகரிப்பதற்கு தந்திரோபாயங்களை மேற்கொள்ளவேண்டும்.
மொழி பேச்சு குறைபாடுடைய பிள்ளைகள்
பிள்ளைகள் இடத்திலே பேச்சும் மொழியும் இயற்கையாகவும் சிறப்பாகவும் அமைந்திருப்பது கற்றலுக்கு அவசியமானவையாகும். இவற்றில் ஏற்படும் இயலாமைகள் கற்றலில் வெகுவாக பாதிக்கின்றது பேச்சுக் குறைபாடு என்பதை பேச்சொலிகளை எழுப்புவதில் அல்லது குரலின் தரத்தில் ஏற்படும் சிரமங்களை குறைகின்றது. பேச்சில் ஏற்படும் தடைகள் மூலம் இது வெளிப்படுகின்றது. திக்குதல் ஒலி உருவாக்கப்படும் விதம் போன்றவை இத்தடைகள் ஆகும். இவை உச்சரிப்பு அல்லது ஒலிசார் குறைபாடுகளாகும். உச்சரிப்பு ஒழுங்கீனங்கள், பேச்சொலியின் ஏற்றம் இறக்கம் ஆகியவற்றில் பிரச்சினைகளை ஏற்படுத்தும். மொழிக் குறைபாடு என்பது வார்த்தைகளை பயன்படுத்துதல் மற்றும் விளங்கிக் கொள்வதில் உள்ள இயலாமை ஆகியவற்றில் உள்ள குறைபாடு ஆகும். திக்குதல் இதன் முக்கியமான ஒரு பகுதியாகும். திக்குதல் என்பது ஒலிகளை ஏற்படுத்துவதுடன் தொடர்பான பிறப்புரிமையியல் நரம்பு சார்ந்த பிரச்சினையாகும். கற்றல் மற்றும் சூழல் காரணிகள் மற்றும் மனவெழுச்ச மற்றும் பதகளிப்பு முதலிய காரணங்களால் ஏற்படலாம்.
பேச்சு மொழி சார் குறைபாடுடைய பிள்ளைகளுக்கு பின்வரும் கல்விசார் நடவடிக்கைகளை மேற்கொள்ளலாம்.
இலக்கண வடிவங்களை மெதுவாக வேகத்தில் பயிற்சி அளித்தல்
பிள்ளைகள் சொல்வதை மிக கவனமாகவும் பொறுமையாகவும் செவிமடுத்தல்
சரியாக பேசுவதற்கு போதுமான பயிற்சி அளித்தல்
அதன் மூலம் அவர்களது தன் மதிப்பை குறைக்காது இருத்தல்
எளிய தெளிவான சொற்களை பயன்படுத்தி கதைத்தல்
குழு வேலையின் போது சிரமப்படும் பிள்ளைகளை உதவி செய்ய விரும்பும் பிள்ளைகளுடன் சேர்த்து வைத்தல்
உடல் குறைபாடு உடைய குழந்தைகள்
உடல் குறைபாடு என்பது காயம் அல்லது விருத்தியில் ஏற்படும் தாமதம் காரணமாக அசைவுச் செயற்பாடுகளை இணைப்பாக்கம் செய்வதற்கும் உடல் தொழிற்பாடுகளை மேற்கொள்வதற்கும் மிகக் குறைந்த உடல் சார் இயல் அளவு என வரையறுக்கப்படுகின்றது.உடல் சார் குறைபாடுகளாக மூளைச்சோர்வு, ஸ்பைனா பிபிடா, தசை அழற்சி போன்றவற்றை குறிப்பிடலாம்.
ஓட்டிசம்
ஓட்டிசம் என்பதும் விசேட தேவைகள் சார் வகைப்பாட்டில் ஒன்றாகும். தமிழில் தற்புனைவு அல்லது தன்னாழ்வு அல்லது தற்சிந்தனை என அழைக்கப்படும். தனக்குள்ளேயே ஒரு உலகத்தை உருவாக்கி அதில் ஆழ்ந்து விடுவதை குறிக்கின்றது. ஒரு நபர் பார்ப்பதையும் கேட்பதையும் வேறு உணர்வுகள் பற்றி யதார்த்த பூர்வமாக விளங்கிக் கொள்ள முடியாத வகையில் வாழ்நாள் பூராகவும் நிலவும் ஒரு குறைபாடாகும்.
ஓட்டிசத்தால் பாதிக்கப்பட்ட குழந்தைகள் சாதாரண குழந்தைகள் போன்றே தோற்றமளிப்பர் கண்டுபிடிக்க முடியாது. 1000 குழந்தைகளில் இரண்டு தொடக்கம் நான்கு குழந்தைகளுக்கு ஒட்டிசம் ஏற்படுவதாக குறிப்பிடுகின்றனர். இத்தகைய பாதிப்புகள் அதிகம் ஏழை குடும்பங்களைச் சேர்ந்த பிள்ளைகளை அன்றி பணக்கார குடும்பத்தைச் சேர்ந்த பிள்ளைகளுக்கு இருப்பதை அவதானிக்க கூடியதாக உள்ளது.
பாதிக்கப்பட்ட பிள்ளைகளின் இயல்புகள்
தனக்குள்ளே ஒரு உலகத்தை உருவாக்கி ஒதுங்கி இருத்தல்
உயிருள்ள பொருட்களைவிட உயிரற்ற பொருட்கள் மீது அதிக நாட்டம் கொண்டவர்களாக இருப்பர்
ஒரு பொருளை முழுமையாக பார்க்காது ஒரு பகுதியை மட்டுமே பார்க்கும் குறுகிய பார்வை தெளிவு கொண்டவர்களாக இருப்பர்
எந்தவித பிரதிபலிப்பு காட்ட மாட்டார்கள்
ஏனையவர்களுடன் பேசுவதை பெரும்பாலும் தவர்த்துக் கொள்வர்
மாற்றங்களை விரும்பாத தன்மைகளும் காணப்படும்
நடத்தைகளை பொருத்தவரை செயற்கையான நடத்தைப் பங்குகளை வெளிப்படுத்துவர்
இத்தகைய ஓட்டிசம் ஏற்படுவதற்கு மரபணுக்களில் காணப்படும் குறைபாடுகள், மூளை பாதிப்புகள், தாமத முதிர்ச்சி, புலன் ஒருங்கிணைப்பு கோளாறு, வளர்சிதை மாற்றக் குறைபாடு, நாளமில்லா சுரப்பி குறைபாடு போன்றவை காரணமாகும் என ஆராய்ச்சியாளர்கள் குறிப்பிடுகின்றனர்.
ஓட்டிசத்தால் பாதிக்கப்பட்ட குழந்தைகளுக்கான வகுப்பறை உதவியாக கீழ் வருவனவற்றை மேற்கொள்ளலாம்.
படங்களை முதன்மையாகவும் சொற்களை இரண்டாவதாகவும் பயன்படுத்தல்
நீண்ட அறிவுறுத்தல்களை தவிர்ப்பதுடன் வாசிக்க முடியுமாயின் எழுதிக் கொடுத்தல் வேண்டும்
வரைதல், கணினித்திறன்களில் ஆர்வம் காணப்படின் ஊக்குவித்தல்.
கவனச் சிதறல்களால் பாதிக்கப்படும் பிள்ளைகளுக்கு பொருத்தமாக உதவிகளை வழங்குதல் வேண்டும் எந்த விடயத்தில் கவனம் திரும்பி இருக்கின்றதோ அதனை ஊக்குவிக்கவும் கற்பிக்கவும்
மேற்குறிப்பிட்ட விசேட தேவையுடைய பிள்ளைகள் உளரீதியாக அதிக வேதனைக்குட்பட்டிருப்பர். அதனால் அவர்களுக்கு ஆலோசனை வழிகாட்டல் சேவை வழங்குவது மிகவும் அவசியமாகும். தற்காலத்தில் அவர்களுக்கு பல்வேறு அமைப்புகளும் கல்வியை வழங்குவதற்கு உரிய வசதிகளையும் வாய்ப்புகளையும் உருவாக்கியுள்ளன இத்தகைய வாய்ப்புக்களை குறிப்பிட்ட விசேட தேவையுடைய பிள்ளைகள் பயன்படுத்துவது குறைவாகவும், இவர்கள் தாங்கள் பாடசாலைக்குச் சென்றால் அங்கு உள்ள சாதாரண பிள்ளைகள் தங்களை கேலி செய்வர் அல்லது வித்தியாசமாக பார்ப்பர் என கவலை அடைகின்றனர். இத்தகைய மாணவர்களின் மனநிலையை பெற்றோர்கள், ஆசிரியர்கள் மாற்றி அவர்கள் கல்வியில் சிறந்த முறையில் ஈடுபட துணையாக இருத்தல் அவசியமாகும்.
-RASIMA .BF (BA-R)
Comments
Post a Comment